პარლამენტმა საკონსტიტუციო ცვლილებებზე პრეზიდენტის ვეტო დაძლია

საქართველოს პარლამენტმა საკონსტიტუციო ცვლილებებზე პრეზიდენტის ვეტო 117 ხმით დაძლია. 

„ჩვენ ნამდვილად მივიღეთ ეროვნულ ინტერესებზე აგებული ევროპული ტიპის კონსტიტუცია, რომელიც უზრუნველყოფს საქართველოს გრძელვადიან დემოკრატიულ განვითარებას“, - განაცხადა პარლამენტის თავმჯდომარე ირაკლი კობახიძემ.

დეპუტატებმა პრეზიდენტის მოტივირებული შენიშვნები არ გაიზიარეს და კენჭისყრის შედეგად, პროექტების პირვანდელ რედაქციას მხარი ხმათა უმრავლესობით დაუჭირეს.

თავდაპირველად კენჭი პრეზიდენტის მიერ შეთავაზებულ პროექტს ეყარა, რომელსაც მხარი 8 დეპუტატმა დაუჭირა, ხოლო 110 - მა ხმა წინააღმდეგ მისცა.

პარლამენტმა, 117 ხმით, 7-ის წინააღმდეგ, „საქართველოს კონსტიტუციაში ცვლილების შეტანის შესახებ“ საქართველოს კანონპროექტის პირვანდელ რედაქციას დაუჭირა მხარი.

უმრავლესობამ ვეტო დაძლია „აჭარის ავტონომიური რესპუბლიკის შესახებ“ საქართველოს კონსტიტუციურ კანონპროექტზეც. პროექტის პირვანდელ ვერსიას მხარი პარლამენტის 117-მა წევრმა დაუჭირა.